كونۆەنتسياعا 1933 جىلعى 26 جەلتوقساندا مونتەۆيدەو قالاسىندا (ۋرۋگۆاي رەسپۋبليكاسى) قول قويىلعان. كونۆەنتسيانىڭ نەگىزگى ماقساتى ايىپتالۋشىلاردى نەمەسە سوتتالعان ادامداردى الەۋمەتتىك وڭالتۋعا جاردەمدەسۋ ماقساتىندا ولاردى ۇستاپ بەرۋ سالاسىنداعى ىنتىماقتاستىقتى ورناتۋ, سونداي-اق سوتتالعان ادامدار ءۇشىن جازاسىن ءوز ەلىندە وتەۋ مۇمكىندىگىن جاساۋ.
وسى كونۆەنتسيانىڭ ەرەجەسىنە سايكەس قاتىسۋشى مەملەكەتتەر وزدەرىنىڭ اۋماعىندا جۇرگەن ايىپتالۋشىلاردى نەمەسە سوتتالعان ادامداردى قىلمىسى ءۇشىن قىلمىستىق قۋدالاۋدى جانە سوت ۇكىمىن ورىنداۋدى جۇزەگە اسىرۋ ءۇشىن بەرۋگە مىندەتتەنەدى.
كونۆەنتسياعا سايكەس ۇستاپ بەرىلگەن ادامنىڭ ۇستاپ بەرۋدى سۇراتۋعا سەبەپ بولعان قۇقىققا قارسى ءىس-ارەكەتتى جاساۋ جولىمەن الىنعان نەمەسە دالەلدەمە رەتىندە پايدالانىلۋى ىقتيمال مۇلكى تاركىلەنۋگە جانە تالاپ ەتۋشى ەلگە بەرىلۋگە جاتادى.
كونۆەنتسيانى راتيفيكاتسيالاۋ كەزىندە قازاقستان رەسپۋبليكاسى كونستيتۋتسياسىنىڭ 11-بابىنا سايكەس كونۆەنتسيانىڭ 2-بابى بويىنشا وزدەرىنىڭ ازاماتتارىن ۇستاپ بەرمەۋى تۋرالى, سونداي-اق 15-بابى بويىنشا ىزدەستىرىلىپ جاتقان ادامنىڭ م ۇلىكتەرىن تاركىلەۋ جانە بەرۋ قازاقستان رەسپۋبليكاسىنىڭ زاڭناماسىنا سايكەس جۇزەگە اسىرىلاتىنى جونىندە مالىمدەمە جاساۋ ۇسىنىلادى.
قۇجات پالاتا قاراۋىنا جىبەرىلدى.
